Жаңбырлы балдырғандар

Жыл сайын 2 сәуір – Бүкіләлемдік аутизм мәселесі туралы ақпарат тарату күні ретінде аталып өтеді. Бұл айтулы күнді БҰҰ Бас Ассамблеясы аутизмге шалдыққандарға қоғамның назарын аудару үшін 2008 жылдан бастап белгілеген. Аутизмге шалдыққан кейбір балақайлардың дені сау құрбыларынан әлдеқайда ақылдырақ, талантты болатыны шындық. Олардың әсіресе, есептік техникаларға деген әуестігі таңғалдырады. Бар қиындық – олардың басқа жандармен қарым-қатынасқа түсуінде. Ешкіммен араласпай өскен балаларда өсе келе әртүрлі психикалық ауытқушылықтар болуы мүмкін. -Аутизм туралы ақпараттар бертін келе таратыла бастады. Осындай ауытқушылықтары бар балғындарды енді ғана танып-біліп жүрміз, оларға өздерін қажетті санайтындай қолайлы орта қалыптастыру керек. Ең басты мақсатымыз – осындай ерекше балаларды қоғамға бейімдеп, әлеуметтік қолдау көрсету. Осы бағытта дефектолог, психолог, логопед, сияқты мамандардың кешенді көмегіне және еңбек терапиясы қызмет атқарады. Іс-әрекетінде аутизмнің белгілері бар балалардың әрекеттері әртүрлі болуы мүмкін. Біреуі елден оқшауланып, томаға-тұйық отырса, екіншісі керісінше, бір қимылды тоқтамастан қайталай береді.